طنط: هااااا يا قمر يا جميله قررتى ايه؟؟ علمى ولا أدبى؟؟
أنا: علمى انشاء الله يا طنط أو أدبى لسة مش عارفة
طنط: أدبى؟… وتدخلى كلية إيه؟؟
أنا: اعلام , أداب أى حاجة اصل انا ميولى ادبية وبحب علم النفس والتاريخ اوى ….
طنط: بلا أدبى بلاقرف عايزينك تدخلى كلية عدله طب , صيدلة , هندسة .. حاجة كده عليها القيمة تليق بيكى.
أنا :ربنا يقدم الى فيه الخير.
طنط: هاااااا يا قمر يا جميلة قررتى ايه؟؟ هتدخلى كلية ايه؟؟
أنا: انشاء الله هندسة.
طنط: هندسة ايه وهيا الهندسة دى بتاعة البنات..من قلة المهندسين يعنى..ياشيخة مش كنتى دخلتى أدبى وروحتى اى كلية اربع سنين وريحتى دماغك هيا البنت يعنى مسيرها لايه فى الاخر..!!
أنا: مش عارفة ارد ولو حد فيكم عنده رد ياريت يقولهولى…لإنى واثقة انى عمرى ما كنت هعرف أريح طنط…وتتوالى الاسئلة من طنط اياها…علمى ولا أدبى؟ هتدخلى كلية ايه؟ مافيش عريس؟ طب مافيش عريس ليه؟ مش معقوووول اتخطبتى؟ بيشتغل ايه خطيبك؟ بيقبض كاااام؟ بيجيبلك هدايا؟ اخر هدية جبهالك بكام؟ بيدخل عليكم البيت وأيده فاضية ولا مليانة؟ طب هتتجوزى امتى؟ هتتجوزى امتى؟ كمان مرة عشان خاطرى هتتجوزى امتى؟ (اصل انا مخطوبة وبتسأل السؤال ده كل يوم بمعدل 18 او 20 مرة) الف الف مبروك اتجوزتى؟ طب مافيش حاجة جاية فى الطريق؟ عايزين نفرح بيكى؟ لسة مافيش نونو؟ طب العيب من مين؟
مااااااشاااااء الله وانتى فى الشهر الكام دلوقت ياروحى يا قلبى انتى؟ بتروحى لدكتور ايه؟ كشفه بكام كنت سامعه بيقولوا انه غالى؟ هتولدى امتى؟ بنت ولا ولد؟ بسم الله مشااااء الله هتخاويه امتى؟؟عايزين نفرح بيكى بقا؟
الغريبة ان نص الاسألة الى طنط بتسألها ردها الطبيعى المتوقع “انشاء الله” او “الحمدلله” او “ربنا يقدم الى فيه الخير” ولو انا عايزة أغلس ممكن يكون ردى “وانتى مالك يا طنط” بس طبعا مقدرش وطنط عارفة كده كويس بس لسة بتسألنى برده ومش عايزة تريح دماغها..
ارجوكى يا طنط حلى عن سمايا سيبينى اشوف مصلحتى متشتتيش طاقتى الايجابية فى تفكيرك وأسألتك السلبية..سيبينى أشوف حالى و حياتى من غير ضغط يأثر على اختياراتى وقراراتى …
مقدرش اعمم واقول ان طنط شريرة 100% اوقات طنط بتبقا عايزة تطمن عليا ومتقصدش حاجة وحشة .. بس بصراحة انا بزهق يا طنط من اسألتك الكتير..وعلى رأى المثل “يا داخل بين البصلة وقشرتها..ما ينوبك الا .. الا ..