المقادير:
* كوب أرز
* ملعقة كبيرة زبدة أو زيت
* 1?2 معلقة صغيرة زعفران
* 1?4 معلقة صغيرة كركم
* 2 ملعقة كبيرة ماء ورد
* 2 مسمار قرنفل
* 2 فص حبهان
* 2 ورقة لاورا
* ملح وفلفل
* عود قرفة
* 3 ملعقة كبيرة لبن (اختياري)
ملحوظة:
في الوصفة دي يفضل إنك تحضّري كل حاجة جنبك علشان ماتنسيش حاجة، والكمية اللي أنا حطّاها دي تعمل طبق من الأرز البرياني، يعني إنتي ممكن تزوّدي المقادير على حسب احتياجك.
الطريقة:
1- اغسلي الأرز كويس، وانقعيه في شوية ميه، وسيبيه لمدة ربع ساعة أو لغاية ما تجهّزي باقي المكونات.
2- اخلطي الكركم مع ملعقتين من ماء ورد وقلّبيهم مع بعض كويس، ونفس الخطوة اعمليها مع الزعفران، وسيبيهم على جنب.
3- هاتي الحلة اللي هتعملي فيها الأرز، وحطّي فيها الزبدة ومعاها كل التوابل اللي عندك، وقلّبيهم مع بعض على النار، لغاية ما ريحة التوابل تطلع، وبعد كده ضيفي عليهم شوية من الميه اللي كنتي ناقعة فيها الأرز، وقلّبيهم مع بعض كويس، وضيفي معاهم الملح والفلفل، وممكن تضيفي كمان مكعب مرقة دجاج، واللبن، وتقلّبيهم كلهم مع بعض.
4- بعد كده ضيفي عليهم الأرز، وقلّبيه كويس مع باقي المكونات، وسيبيهم على نار متوسطة لغاية لما يشرب السوائل كلها، وبعد كده ارفعي عنه الغطاء، وقلّبي الأرز تاني كويس، وساوي سطح الأرز بالملعقة.
5- هاتي خليط مية الورد والكركم، وحطّيه على جانب واحد من الأرز، وحطّي خليط الزعفران ومية الورد على الجانب الآخر، وسيبي الجزء اللي في الوسط أبيض من غير ما تلقبي الأرز على بعضه
6- وبعد كده غطّي حلة الأرز كويس، وسيبي الحلة على نار هادية جدا لمدة تلت ساعة، وبعد كده اطفي عليه، وسيبيه من غير ما تفتحي عليه حوالي ربع ساعة كمان، وبعد كده قلّبي الأرز، وقدّميه مع فراخ أو لحمة.
طريقة تحضير اللحمة لتقديمها مع الأرز البرياني
كل اللي عليكي إنك تشوّحي بصلة مقطّعة قطع صغيرة مع نفس البهارات اللي حطّيتيها مع الأرز في شوية زيت صغيرين، وبعد كده بتحطّي عليه صلصة طماطم واللحمة، وسيبيها تستوي مع الصلصة، لغاية ما الصلصة تتسبّك تماما وتبقى كثيفة، وعند التقديم؛ حطّي الأرز في طبق التقديم، ووزّعي عليه الصلصة، وعلى الوش حطّي قطع اللحمة.. وبالهنا والشفا.