انا جايب يا جماعم معلومات مهمة عن سرنجات الانسولين
الموضوع ده للناس إللى لسة أول مرة ينزلوا صيدلية ...
هى حاجة سهلة و عبيطة بس لازم طبعا الكل يبقى عارفها
فى الصيدلية بتلاقى نوعين من السرنجات علشان الأنسولين
واحدة متقسمة 40 درجة و التانية مقسمة 100 درجة
على فكرة الإثتين نفس الحجم 1 مم ... طب ليه عملوا التقسيمتين دول !! أقوللك
الجرعة بتاعة الأنسولين لما الدكتور بيكتبها بتبقى بالوحدات و ليست بال مم زى الحقن العادية و فى الصيدليات فيه نوعين من الحقن الأنسولين واحدة مكتوب عليها 100 وحدة لكل مم و التانية مكتوب عليها 40 وحدة لكل مم
إذا لو الدكتور كاتب جرعة 20 وحدة و هو بياخد من الحقنة إللى مكتوب عليها 40 وحدة لكل مم همسك سرنجة متقسمة 40 درجة و أسحب بيها لحد العلامة 20 و بكده يبقى أنا حصلت على الجرعة إللى أنا عايزها 20 وحدة
نفس الكلام ... المطلوب 20 وحدة .. من حقنة مكتوب عليها 100 وحدة لكل مم ... همسك سرنجة مقسمة 100 درجة و أسحب بيها لحد العلامة 20
المشكلة أو اللخبطة ممكن تحصل لو حد سحب بسرنجة 40 من حقنة 100 وحدة لكل مم أو العكس
مثلا ... المطلوب 20 وحدة .. المتاح أمامى حقنة 100 وحدة لكل مم ... لو عندى سرنجة 100 خلاص مفيش مشكلة هسحب لحد العلامة 20 ... طب لو معنديش غير سرنجة 40 !!!
لو سحبت لحد العلامة 20 يبقى انا أخدت نص حجم السرنجة يعنى نص مم يعنى كأنى سحبت لحد العلامة 50 لو كانت دى سرنجة 100 .... و ده معناه إنى سحبت 50 وحدة مش 20 و ربنا يستر على المريض لو مخدتش بالك و إديتهاله
و عشان كده إحتياطيا بستخدم سرنجة 100 مع الحقنة ال 100 و سرنجة 40 مع الحقنة 40
لكن ينفع برضة أستخدم سرنجة 40 مع حقنة 100 أو العكس بس لازم أخد بالى إنى أحسب الجرعة بالظبط
يعنى فى المثال إللى فات كنا عايزين 20 وحدة من حقنة فيها 100 وحدة أنسولين ... لو معانا سرنجة 100 كنا هنسحب لحد العلامة 20 يعنى خمس حجم السرنجة
إذا لو هسحب بسرنجة 40 يبقى أخد لحد خمس السرنجة برضة لأننا إتفقنا إن السرنجتين حجمهم واحد
40 * 2. = 8
يبقى المفروض أسحب لحد العلامة 8 فى السرنجة 40
أو أسحب لحد العلامة 20 فى السرنجة 100
أتمنى إنى أكون قدرت أوضح المعلومة بشكل كويس