فيه عده انواع من الطباعه لازم المصمم الدعائى يكون عارفهم لان دول هما اللى كل شغله حيطبع بطريقه منهم والنوع اللى حنتكلم عنه النهارده هوه الطباعه الاوت دور
طباعه خارجيه ( ( out door اوت دور
وهى احدث طباعه فى المجال ده وأهم خصائها هى :
- جوده الطباعه بها حتى 150 بكسل/انش ( المكن اللى موجود فى مصر اخره يطلع 72 بكسل / انش بجوده عاليه لكن لو اعلى من كده متضمنش حتبقى الطباعه عامله ازاى )
- طباعه زيتيه بالوان CMYK
- تطبع ابعاد كبيره جدا تصل ل 10 متر عرض فى 100 متر طول ( المكن اللى موجود فى مصر حاليا اخره سبعه متر عرض )
- تتحمل العوامل الجويه من شمس ورطوبه وغيرها
- الماكينات مثل : فيوتك ( امريكية الصنع افضلهم في غالبية الخصائص ) ...صالصا ( اسرائيلى وللأسف تعادل الفيوتك في جودتها ....ووللأسف الاكبر تتواجد عند بعض الشركات في مصر ولبنان )...(رولاند (المانية الصنع.. افضلهم في جودة الطباعة ...و دي جي آي ( كوري واكثرهم انتشارا في السوق المصرية وافضلهم في قوة التحمل والعمر الطويل )
- وهناك ماكينات صينية ضعيفة الجودة زهيدة السعر مثل انفنتي ....واتش بي للاوت دوور
نتكلم بقى عن الخامات :
الخامات فى الاوت دور بتبقى كالاتى :
- الفلكس : مادة بيضاء تميل الى الزرقة ...لدنة مصنوعة من المطاط وبعض المنتجات البترولية وتكون مدعمة بداخلها بنوعيات من المعادن على هيئة خيوط
يعتبر الفلكس من اقوى وامتن خامات الطباعة حتى وقتنا الحالى ....ويتميز بالتالي:
مقاومته للشد والضغط - مقاومته للعوامل الجوية في كل الظروف - نصاعة بياضه - نفاذيته للاضاءة بجميع انواعها ( والنقطه دى مهمه جدا انكم تعرفوها لان لو اتطلب منك تصميم يافطه وحتتركب فى شاسيه ووراها اضاءه يبقى لازم الخامه تكون فلكس - امكانية تثبيته بالمسامير
- البانر : مادة بيضاء .....توصيفاتها مثل الفلكس تماما ......عدا انها تقل عنه في التالي
عدم مقاومته للعوامل الجوية زى الفلكس مش زاهى زى الوان الفلكس – مينفعش نهائى الضوء يعدى منه ( علشان كده لو اتطلب منك تصميم يافطه ومش حتبقى الاضاءه من وراها يبقى تطبع على خامه بنر )
- الفينيل : مادة لاصقة مختلفة الألوان .....ولكن مش زى الاستيكر حيث قوة لصق الفينيل اعلى قوة تجدها في لصق بلاستيكي حيث انها عندما تلصق على صاج او معدن لا تفك الا بالبلاور ( الحارق الناري ) وللفينيل عدة استخدامات في مجال الاعلانات غير الطباعة....فمن الممكن ان يصمم تصميمات واير بواسطة الكورل او الاليستراتور ويصدر التصميم الى ماكينات الكاتر بلوتر "cutter ploter " فتقطعها الى كلمات واشكال تلصق على الفليكس والبانر مثال على ذلك اعلانات شركات موبينيل وفودافون والاتصالات وغيرها من شركات المحمول
ده كان درس النهارده عن الطباعه الاوت دور
وبرضه خلى بالكم من نقطه نفاذ الضوء
لو اتطلب منك تصميم ليافطه واليافطه دى مش حيبقى تحتيها لمبات مثلا يبقى تطبعها بانر والعكس لو حيبقى تحتها لمبات يبقى تطبعها فيلكس
والتصميم دايما يكون بريزليوشن 72 على الفوتوشوب
واستنوا كمان الدروس الجايه حتكون عن الطباعه الان دور وفصل الالوان وطباعه السلك السكرين
واى استفسار اتفضوا قولوه وانا حاجاوب فى اسرع وقت ممكن ان شاء الله
وبالتوفيق للجميع
وشكرا
شريف عبد الهادى
مدير اكاديميه الدعايه والاعلان