بسم الله السلام عليكم
بنات بعترف انى اترددت كتير انى اكتب الموضوع دا
لانى ضد اثارة الرعب
ومش بتحمل ان حد يشكك فى كلامى
وكمان اعصابى تعبانة مش حمل جدال
بس استوقفتنى كلمة للعضوة اللى اكتر من اختى
راما اسمعلاوية وافتخر
قالتلى لازمى تحذرى الناس
والساكت عن الحق شيطان اخرس
يابنات اللى حصل معايا النهاردة صدمة بالنسبالى
كتير بنقول هنا فى القسم ان الفتنة الطائفية دى اللى بيعملها
امن الدولة عشان يولعوا البلد
بس عارفين الكلام حاجة ولما تشوفى بعينك حاجة تانى
انا بسمع من كام يوم ان امن الدولة بتجتمع فى السر
عشان تنتقم وتحاول ترجع مع النظام القديم باى شكل
النهاردة بقى كنت بره البيت وفى العصر لقيت ناس
بتلزق ورق على الحيط
مكتوب عليه دولة اسلامية اسلامية
ونهون نهون واسلامنا لايهون
وكلام من بتاع سنقاتل وسنحارب وكدا
ومن تحت توقيع
الجماعات الاسلامية
كل دا هين وعادى مااحنا فعلا لازم نفدى دينا بدمنا وكل مالدينا
اللى شل تفكيرى وقبض قلبى
انى لقيت ان مرشدين امن الدولة هما اللى بيلزقوا الاعلانات دى 
وقفت متنحة واتشليت فى مكانى
هتقوليلى عرفتيهم ازاى
لانهم ساكنين قريب من بيت بابا ومعروفين جدا عندنا فى المنطقة
وكمان كان اى حد عاوز خدمة او تصريح او رخصة كان بيرحلهم وبيخلصوله اللى عاوزه
بعلاقتهم بالظباط وكمان كانوا حالتهم معدومة وبعد مااشتغلوا مع امن الدولة
تعالو شوفوا العز اللى هما فيه
عمارات وشقق وعربيات وتسهيلات من كل الانواع
اتاكدت ساعتها ان امن الدول فعلا شغال بس مدارى
بس اللى مجننى انى انا شفتهم
بس غيرى ماشفهمش
حطيت نفسى مكان اى مسلم
هيقرا الكلام دا
حاجة من اتنين
اما هيحس ان الدين فى خطر وتاخدوا الحماسة
او انه هيخاف ويوقلك ايه دا هو الارهاب رجع تانى ياريت مبارك فضل
ولو مسيحى شاف الكلام دا هيكون ايه حاله اكيد هيصدق انه فى حرب اهليه
حسبنا الله ونعم الوكيل
هنيجى للوجه الاخر
مايكل منير واقباط المهجر
سمعت من كام يوم فى مركز كنت قاعدة فيه لقت واحدة مسيحية بتقول
مايكل منير ربنا ياخده
جاى يولعها نار
احنا عايشين مع المسسلمين جيران وحبايب بنخبز مع بعض ونفرح ونزعل مع بعض
ومافيش حد حس ان فى مشكلة من اى نوع
هو عايش فى امريكا طبعا ومايهمهوش انها تولع والناس تدبح فى بعضها
ياجماعة اقسمت عليكم بالله اصمدوا والله انها لفتنة وابتلاء
والله العظيم العملاء دول لايفرق معاهم دين ولادولة
دول اعوان اليهود اللى عاوزنا نخلص على بعض ويدخلوا البلد براحتهم
الى كل مسلمة ومسيحية احنا لغاية دلوقتى الحمد لله فى امان
لكن لو اتبعنا الفتنة
بصوا لفلسطين اليهود مش بيميزوا بين مسيحى ولا مسلم
مش بيميزوا بين جامع ولا كنيسة
بيدوسوا الاعراض ويقتلوا الاطفال
والله لادين له ولا يهمهم سوى مصالحهم
ارجوكم بلاش ننفخ معاهم فى النار
لازم نقف ايد واحدة البلد دى بلدنا احنا الاتنين ومافيش حد يقول غير كدا
كان رسول الله اذا خرج لغزو الاعداء يوصى
لاتهدموا كنيسة
ولاتروعوا عابد
ولا تكسروا صومعه
كان سيدنا خالد بن الوليد لما يكون فى غزوة ويمر بكنيسة او دير
يترك عليها كتيبة تؤمنها وتحرسها
ان رسول الله برئ ممن يتعرض لايا منكم ولو بكلمة طالما انتم لم تبدؤا العداء
فى الاخر
انا برد على كل المتامرين
اقسم بالله العلى العظيم ان احافظ دينى ووطنى واحافظ على اى دور عبادة ولا اتعرض له بسؤ
وهقف لاى واحد هيقف قصاد مسلم او مسيحى اومسلمة او مسيحية مالهمش ذنب فى اى حاجة
انا مااقدرتش اكتب الموضوع دا غير لما اعصابى ارتاحت شوبة
اسالكم بالله اننا نقف مع بعض ايد واحدة عشان نحافظ على بلدنا
اللى لو خربت هتخرب على الكل
ولو عمرت هتعمر بالكل وللكل
اكيد كلنا لينا مطالب وشكاوى
بس ارجوكم نصبر شوية على البلد
وبوجه كلمة لمسلمين لاتنسوا اخلاق نبيكم
لاتنسوا ان الاسلام انتشر بالاخلاق الطيبة والاعمال الصالحة
للمسيحين
اقسم لكم بالله ان ربنا ورسوله اوصونا بكم
ولا نخفى فى صدورنا لكم اى كيد او حقد او ضغينة
لكم دينكم ولى دين