ايوة سمان مش حمام ...ماتستغربوش اصل الحمام بقي عندنا عملة نادرة واللي يشوفه يقول حمام
بصي ياستي المقادير
سمان كبير .. كبييييير خلي بالك من كبير دي عشان يبقي مالي مركزه كده
2 بصلة كبيرة
1\2 كيلو كبد وقوانص
ارز
توابل
ملح
وآآآآآآآآدي الطريقة وسهلة مش هتتعبوا كتير
اولا نغسل السمان كويس ونسيبه علي جنب
ونغسل الكبد والقوانص ولو حابين نقطعها هتستوي اسرع وتوفر علينا تقطيعها بعد السوا
نيجي بقي للحشو ( ارز بالخلطة )
نقطع البصل صغير ونحمره في ملعقه زيت يعني يدبل بس
بعد كده نضيف له الكبد والقوانص و نتركهم حتي السوا
اوعوا تنسوا تحطوا الملح والتوابل
نغسل الارز علي اما الكبد والقوانص تستوي شوية ونضيفه
انا شلت شوية من الكبد والقوانص عشان كنت عاملة كمية ارز قليلة بتاع 3 كوب صغير
وممكن تزودي الكمية لو لقيتي الرز هيبقي كتير قوي يعني كل واحد وتقديره وزي مابتحبوا
ونضيف ماء مغلي قليل يادوب يغطي وش الارز مش نفس كمية الماء لو هنسويه بالكامل وماء مغلي مش ساقع عشان عملية التسوية تكمل وماتفصلش علي اما الماء يسخن
ملحوظة :
ماتسويش الارز قوي عشان لسه هيستوي بعد الحشو
هاتي السمان واحشيه بالارز والباقي من الارز هنزود له شوية ماء ونكمل تسويته وبيتقدم لوحده
هنحط السمان في الحلة ونتركه شويه علي نار هادية لحد مايتلوح او يمسك نفسه شويه ويبدا ينزل السوائل اللي فيه ونحط ورق لاورا وحبهان
بعد كده هنبدا نزود ماء ساخن وبرده مش كتير عشان الارز مايطلعش من السمان وارفعي النار ولما يقرب يغلي ضيفي الملح وباقي البهارات وممكن تزودي الماء الساخن لو بتحبوا الشوربة
لما تلاقيه استوا طلعيه من الشوربة عشان مايستويش زياده والرز جواه يعجن
قبل التقديم حطيه علي ورق فويل او صينيه تحت الشوايه شويه عشان يتحمر
وبالهنا والشفا