تدرين إني لافقدتك وش يصير؟ أموت في هيئة طفل قد مات جوع
المشكله حبك غدى لقلبي مصير غصب أعشقك ماهو ترى رغبه وطوع
شفتي الأسير؟ حالي أنا مثل الأسير اللي إحترق في غربته مثل الشموع
ماله أمل ويش العمل دامه كسير وإليا بكى يبكي بلا صوت ودموع
وضعي ترى في غيبتك جدا ً خطير والشوق يلعب لعبته بين الضلوع
لو ماني بك يا آنسه شخص(ن) جدير الأفضل إنّا نفترق ، كافي خضوع
الموت حق والعبره دايم ف الأخير وأكبر عيوبي إن لي قلب(ن) قنوع
ولو كنت أطلب ف الهوى شي(ن) كثير كنتي عرفتي للغلا ألفين نوع
ماني ترى ف الحب جاهل أو صغير يمكن أنا ف الحب أفقه ه الجموع
ماراح أقول إن الكبير يبقى كبير لكن بقول إني رجل يخشى الوقوع
يا آنسه وايد قلوب بلا ضمير وإبليس له بين البشر وايد فروع
حد يدّعي الإخلاص والأهداف غير وحد يتبع الشيطان في كل الربوع
أمّا أنا ما أتبع الدرب المرير اللي أبد لاسرت به مالك رجوع
يا بالحلال يضمّنا بيت وحصير يا تتركيني في صلاتي والخشوع
صحيح وضعي ف غيبتك جدا ً خطير وصحيح إنك تسكني بين الضلوع
وصحيح إني في شغف حبك أسير لكن أنا لي خافق(ن) دايم جزوع
مؤمن وياللي مايصح لا مايصير وأهون علي من الخطا ، الموت جوع