رقصة فرح ..
فرشت دروب الحزن بالورد المندِّي ..
بعترت غنوة عبير الحلم من فوق الوشوش
زغرودة طلعت من صدور الأمهات ..
ست البنات " الحرَّة " من بين الشموع ..
فستان زفاف ولاَّ كفن ؟
بيضم روحك .. يبتسم ..
للبدر يبدر فل أبيض ..
فوق تراب الأرض لمَّا تحضنك ..
وتلبِّسِك تاج العروسة ..
وانتي تحت الطرحة متحنية من دمك ..
وأسراب الملايكة رتبت موكب زفافك ..
أعلنت بدء المراسم ..
رفرفت .. طارت بروحك ..
والعيون مليانه بدموع الفرح !!
زغروده طلعت من صدور الأمهات ..
ست البنات الحره من بين الدروع ..
تفتح بساتين الحياة الطيبة
من قلبها ترويها تطرح فل أبيض .. شمع أبيض ..
تُل أبيض ..
تهدي للفارس حصان ابيض .. يطير ..
من فوق سحاب الحزن يرجع بالمطر ..
ويدق أجراس القلوب الميته ..
يحييها تشرب ..
من صلاة الفجر طُهر وترتوي ..
يتفجَّر الدم اللي واقف ف العروق
الشمس تتعلم تغني ..
للطيور الجاية من قلب الشروق
الأرض تتنهد علم ..
أخضر بلون الحلم بيضلل ..
على وش العروسه
والوليد الحي من بين سلك شايك ..
اللي بيشوف الحياة من باب مخيَّم ..
بس عارف ..
انه رغم القصف ..
عايش حر ..
واحنا اللاجئين !!