كتب – رأفت غانم :
نشرت صفحتي 25 يناير يوم الثورة على التعذيب والفقر والفساد والبطالة على موقع التواصل الاجتماعي فيسبوك ومركز النديم لرعاية ضحايا العنف والتعذيب وعدد من الصفحات الأخرى 14 نصيحة للمتظاهرين في حالة القبض عليهم لتقليل المخاطر التي يتعرضون لها أولها تجنب القبض فمن الذكاء ألا تعتقل مرورا بتجهيز رسالة موبايل باسمك وانه تم القبض عليك وإرسالها للمركز التي تهتم بالمعتقلين أو أي أنسان يهتم بك ونشرت النديم ارقام يمكن الاتصال بها أو إرسال الرسالى إليها حال القبض على المتظاهرين .
1 – خلى خيار القبض عليك آخر حاجة .. حاول تجرى و تهرب .. من الذكاء ألا تعتقل من الأساس
2 – فى حالة التقفيل عليك ولا يوجد طريقة للهروب، استسلم حتى لا تصاب ويحصلك مكروه
3 – اول ما تركب العربية لازم تفهم حاجة واحدة مهمة جدا.. ان فى جيش برة من المحامين والمنظمات والقنوات الفضائية ها تنقل الخبر وها تدافع عنك مهما يحصل
4 – بلاش خوف وفزع اهم حاجة ضبط النفس والهدوء فى الفترة الاولانية
5 – بعد ما يتقبض على شباب تانى ويبقى عددكم معقول ابتدوا قسموا الأدوار.. واختاروا واحد بس هوه اللى يتكلم باسم المجموعة و يتفاوض مع ضابط الأمن اللي في العادة بيكون مش عارف يتصرف
6 – جهز رسالة على موبايلاك لجبهة الدفاع عن متظاهرى مصر و اى حد يقدر يوصل صوتك ان تم القبض عليك و ابعتها فوريا اول ماتدخل العربية لانهم هاياخدوا الموبيلات بعدها بشوية
7 – أول ما العربية تتحرك ابتدوا اهتفوا من الشبابيك لمصر والحرية وخبطوا على جدران العربية من كل الجهات.. لو بتدفع تمن انك تظاهرت يبقى عرف البلد كلها ان كان فى حاجة بتحصل و انت فى السكة
8 – فى الغالب العربية هاتلف على اماكن كتير لحد ما يوصلها تعليمات .. ما تنشغلش.. العربية رايحة فين لأن اللى برة كلهم عارفين مكانك ها يبقى فين و ها يتوجهوا عليه قبليك علشان يبتدوا إجراءات الدفاع
9 – فى حالة انك عايز تقضى حاجتك .. فى ازايز او اكياس هاتلاقيها كدة كدة فى العربية .. و الحل الاحسن انك تعملها تحت عقب الباب على برة علشان تقرف الامن اللى قاعدين فى خلفية العربية
10 – نظم الوقت ما بين الهتاف من الشبابيك ومابين الخبط ومابين لحظات الهدوء اثناء التفاوض
11 – لازم وأنت بتتفاوض تفهم الضابط ان كل المنظمات برة عارفة انتوا فين و انكوا اتقبض عليكوا
12 – أكثروا من الغناء الوطنى لرفع المعنويات .. و خصوصا للناس اللى هايتقبض عليها غلط هايبتدوا ينهاروا و دة دور اللى فاهميين يعرفوهم و يفهموهم
13 – فى حالات هايتم فيها إلقاء المقبوض عليهم فى الصحرا مجموعات بعد ما يكونوا اخدوا بطاريات الموبيلات.. فى كل مكان.. هاتلاقى مواصلات ماتقلقش
14 – اهم حاجة متفقدش الروح .. اليوم دة سبقه ايام كتير الناس نزلت فيه علشان بلدها وانت مش اقل منهم وتضحيتك مش اقل من تضحيتهم .. خطوة على خطوة هانوصل