الاهتمام بالمظهر والشكل الخارجي هو أكتر حاجة بتسيطر على تفكير الستات في كل أنحاء العالم، والدراسات أثبتت أن 4% من الستات بس هما اللي عندهم ثقة في نفسهم وعارفين إن شكلهم جميل. في حملة دعائية عملتها شركة Dove لمستحضرات التجميل، حاولت الشركة إنها تقنع الستات إن الجمال لازم يكون مصدر للثقة والراحة مش العكس، وإنه في أغلب الوقت بتكون صورتنا عن شكلنا مختلفة تماما عن الصورة اللي الناس بتشوفنا بيها. التجربة اللي قامت بها الشركة، اعتمدت على رسم صورتين بالقلم الرصاص لكل واحدة من الستات اللي اشتركوا في التجربة؛ الصورة الأولى بتترسم بناء على وصف الست لشكلها من غير ما الرسّام يشوف شكلها الحقيقي، والصورة التانية بيعتمد فيها الرسّام على وصف مجموعة مختلفة من الناس لنفس السيدة. الغريب في التجربة دي إن أغلب الرسوم اللي اعتمد فيها الرسّام على وصف السيدة لشكلها كانت أقل جمالا من الرسوم اللي اعتمد فيها على وصف الناس لنفس السيدة، وده اللي هتلاحظيه بنفسك في الجاليري والفيديو.
تفتكري لو اشتركتي في التجربة دي.. هتكون صورتك عن نفسك إيه؟