ليـه تجفاني ؟

فديتك! ليه تجفانـي ؟

وش اللي ضايقك مني؟

حفظتك وسط أجفانـي

وجاك القلـب مِتْعَنّـي

و الأول كنت لا الثاني

وحرفي فيك متغنّـي

وطيفك ساكن أعيانـي

ولا ليله هجـع عنّـي

يهيّض جمرة اشجاني

يخيّب عقبهـا ظنّـي

تجازيني بهجرانـي!!

وتمشي ما تودّعنـي؟!

كذا تِقفـي وتنسانـي

ولا كنّك و لا كنّـي !

بقلبك كـان عنوانـي

ومن كفّك نبـع فنّـي

بِكتني نغمـة الحانـي

وطول الصمت جنّني

عساك بخير يا الجاني

رجيتك بس طمّنـي!

ومهما تشعل احزانـي

يهمني اتعيش متهنّـي