برامج السطو على المتصفح

السلام عليكم

امبارح كنت بصلح جهاز لصاحبى, الجهاز مشكلته بكل بساطه إنه مليان فايروسات وبرامج تجسس وبرامج السطو على المتصفح.

طبعاُ للتخلص من الفيرسات العمليه بسيطه جداً, مجرد برنامج انتى فايرس وإن الله يحب المحسنين, برامج التجسس نفس الحكاية تشغل برنامج adaware والجهاز ينظف من اغلبية برامج التجسس.

المشكله فى برامج السطو على المتصفح, فى البعض منها الانتى فايرس بيتولاها والبعض الاخر adaware بينظفها, ولكن فى جهاز صاحبى وجدت برنامج سطو على المتصفح ولا اروع من كدا, إلي عمله مش ممكن يكون بنى ادم,البرناج إسمه about:blank تعالو احكيلكو إلي حصل وإنتو احكمو.

شغلت الجهاز وقبل ما اشغل اى حاجه لقيته باعتلى مجموعه من الاعلانات, قلت مش مشكله خلينى انزل adaware الاول, رحت صفحت adaware واول ما حاولت انزل البرنامج عينك ما تشوف إلا النور, لقيت الاعلانات نزلت على الجهاز ولا مدفع رشاش, وصفحت الـadaware إختفت وفى الاخر الجهاز هنج وقفل.

قلت فى نفسى الحل هو إن الواحد يروح save mode وينزل البرنامج من هناك, نفس الحكايه إلى حصلت فى الوندوز حصلت فى الـsave mode, رحت نزلت البرناج على جهازى ونقلته على جهاز صاحبى, وشغلته تمام؟

لا مش تمام لازم الواحد ينزل تحديث, اول ما حاولت اعمل تحديث تفتكرو إيه إلى حصل؟؟ طبعاُ الجهاز هنج و قفل زي كانه بيقولى إجرى إلعب بعيد ياد....

طبعاً انا ماسكتلوش ورجعت شغلته تانى وثالث ورابع, وفى كل مره يعمل فى نفس العمله, قلت خلينى اجرب الانتى فايرس, شغلت النورتون وبحاول اعمل له تحديث النورتون قفل ولا حياة لمن تنادى, حاولت استخدم online antivirus الجهاز هنج وقفل, قلت مافيش حل غير إن انا ادور فى الانترنت, ودورت بعد بحث اكتشفت إن برنامج السطو دا ليه اشكال كتيره جداً ومافيش حل محدد, وماقدرش افرمت الجهاز لان فيه برامج مهمه, واخيراً لقيت صفحه تشرح إزاى تشيل البرنامج يدوياً ولكن مافيش ضمان إن الحكايه دى حتنفع, قلت خلينا نجرب, اول خطوه لازم تنزل برنامج مش فاكر إسمه ولكن البرنامج دا بيوريك اسماء الملفات المشكوك فيها بس لو عايزه يشيل برنامج السطو لازم تدفع 29 دولار, انا قلت لو عرفت اسماء الملفات انا ممكن اشيلها لوحدى, فعلاً نزلت البرنامج وشغلته واكتشف فايلين الواحد إسمه pjp.dll والتانى NAVshExp.dll طبعاً التانى دا موجود فى ملف النورتون وعامل نفسه ملف حمايه, طبعاً الاول شلت الملف الاولانى وجيت اشيل التانى لقيت الاولانى رجع زى ما كان, والتانى محمى ومش راضى يتشال, شغلت الجهاز فى الـsave mode وشلت التانى جيت اشيل الاولانى لقيت التانى رجع, فى الاخر اكتشفت إن انا ممكن اغير اسمائهم بس مش ممكن اشيلهم, قلت الحمد لله فرجت, غيرت إسم شلت الاولانى بعد ما غيرت إسم التانى, والمره دى الاولانى إختفى, بس طبعاً ما عرفتش اشيل التانى إلا بعد ما شغلت الجهاز من جديد.

على كل حال بعد ما المعركه خلصت دورت فى الانترنت عشان اعرف عن برامج السطو على المتصفح لانها صادفتنى كتير, ولقيت العجب العجاب, اخطر برنامج سطو هو about:blank وفى منه انواع كتيره جداً ولحسن حظ صاحبى إنه إلى كان فى جهازه يعتبر من اخفها ضرراً واسهلها فى الازاله, فى انواع الملفات فيها بتغير إسمها وكل ما تشيل منها ملف يرجع بإسم جديد ويحط نفسه فى مكان مختلف.

طبعاً برامج السطو على المتصفح ليها شريط ادوات بيحط نفسه فى المتصفح سواً عجبك او ماعجبكش, ويغير لك صفحة البدايه, ويبعت لك إعلانات, وفى الاونه الاخيره اصبح فى مجموعه كبيره جداً منها وبرامج الانتيفايرس وبرامج الادوير مش عارفين يتخلصو منها.

عموماً لو اكتشفت إن عندك الـabout:blank نصيحه اخويه إتوكل على الله وفرمت الجهاز, وصحتك بالدنيا, دا انا كمان شويه وكنت حعيط, لولا إن الواحد مؤمن بإن الدنيا فانيا, العمليه مش مستاهلا الواحد يخش معركه ويحارب عدو هو مش شايفه.

والسلام