ارز بالجمبري

زوجي العزيز كان نفسه في الجمبري وقال لي اعمله باي طريقه احبها ومرة في مطعم اكلات بحرية طلب ارز بالجمبري مع شوية حاجات غريبة كده فقلت اخترع له ارز بالجمبري وشوريه جمبري وآدي اللي عملته
المقادير :
1/4 كيلو جمبري صغير مقشر او كبير وقطعيه
2ك ارز تقريبا
1 بصلة
2فص ثوم
اطماطم كبيرة
ملح وتوابل
قرنفل

الطريقة :
قطعي البصله صغير او شرائح وسويها في ملعقة زيت لحد ماتبقي لونها اصفر
دقي فص ثوم او قطعيه وافركيه بشوية ملح تحت السكينة وحطيه مع البصل هتلاقي الريحة ايه اوعي
اعملي الطماطماية في الخلاط وضيفيها وسيبي الصلصة تتسبك مع التوابل والملح وضيفي القرنفل والحبهان وزودي الكمون والكسبرة ولو عاوزينه حراق زودي الزنجبيل او الشطة
بعد كده حطي الجمبري وهيستوي علطوووووووووووووووول وبجد بتبقي مفيش ريحه له خالص
ولو عاوزين تتاكل كده مفيش مشكله و اللي عاوزه بارز هنحط له الارز
بعد مانغسل الارز هنحطه ونقلب كويس ولو محتاج ماء نحط له ونسويه زي الارز العادي بالضبط
بعد مايغلي ناخد بالنا منه اول ماينشف ويتشرب الماء نقلبه ونهدي النار ونسيبه لحد مايستوي
ممكن نقدم معاه شوربه جمبري او نحمر الجمبري ونحطه ع الوش او شويه كرفس ... زي ماتحبوا
وبالهنا والشفا