رســاله إلــى زوجــــى

الى حبيبي

فاضل كام يوم ونكمل 12سنه بنحب بعض عدوا كأنهم 12يوم

بحب كل حاجة فيك ضحكتك ,كلامك,هزارك,حتى لما بتكون زعلان

بحب أفتكر إزاي تعبنا سوا لحد ما ربنا جمعنا على خير في بيت واحد

بحب أفتكر نظرتك لية وأنا بفستان الفرح والفرحة اللي حسيت بيها ولما روحنا بيتنا أول يوم

وقعدنا نضحك من كتر الفرحة اننا إتغلبنا على كل الظروف واتجوزنا.

بفتكر يوم الفرح بعد ما انت نمت من التعب واكتشفت انك بتشخر بصوت عالي هههههههههههه

وتاني يوم عشان تدلعني جبت شريط فيديو نتفرج وعليه طلع فيلم محامي خلع وقعدنا نضحك.

ويوم ما ولدت اول بيبي وكنا لسه انا وانت صغيرين ومش عارفين نتعامل مع البيبي وازاي كنت بتكلمني

كل شوية عشان خايف علية من البيبي (انت كنت حاسس انه كائن غريب)

وبفتكراول مرة تسافر وتسيبني وقعدنا نحضن بعض ونعيط فالمطار وكل الناس اتفرجت علينا

واول مرة نتكلم عالنت بعد ما سافرت وانا طبعا بعيط علطول ,ولما جيتلك اول مرة بعد 206 يوم

بعيد عن بعض وازاي حضنا بعض واتجمعنا تاني وجبنا تاني بيبي وفرحتنا بيه وازاي انا وانت لسه

بنحب بعض لحد دلوقتي ومش بنبطل كلام فالتلفون ولا انا ببطل كلام عنك حتى مع نفسي .

عارفة اني ساعات بزعلك وساعات بزعل منك بس والله بحبك (قد الدنيا ده كلها وأكتر)

وعدت السنين واللي كان بقولي ازاي تاخدي واحد مش جاهز ولية تبتدى من الصفر دلوقتي عرف ان الانسان

لو تعب لازم ربنا يجازيه خير واهوه احنا اشترينا شقة جميلة وفرشناها احلى فرش و انت لسه

بتقولي هجبلك كل اللي اتنازلتي عنه عشان نتجوز .

وازاي لحد دلوقتي الناس بتقعد تبص علينا واحنا مع بعض ومش بنحس باللي

حوالينا وكأننا في دنيا لوحدنا.

شكرا يا حبيب عمري والحمدلله ان ربنا جمع ما بينا فالحلال .

على فكرة كنت كل صلاة ولحد دلوقتي بدعي الدعاء ده:

(اللهم اغننا بحلالك عن حرامك واغننا بفضلك عمن سواك واجمع بيننا فالحلال واسعدنا بحياتنا حتى يعجب لنا عبادك اجمعين)

اللي بتحب واحد تدعي ربنا كل صلاة وانشاء الله يكون في خير ليها.

(على فكرة ده بجد حقيقة مش خيال ولسه في حب حقيقي مش كله أوهام بس لازم الصبر والدعاء لربنا)