ماما أمريكا.. تقولنا هِشْ كله في ثانية يخش العش مش هـ نكابر ولا هـ نغامر.. أصل أوامر عمنا بوش.. يبقي الوطن العربي بحاله تركه ورثها أبوه عن خاله، وإحنا حلاله يا ناس معلش.. لما يحب يكون له مزاج.. يدخل سوريا أو بغداد.. أصله الواد والواد .. بيقش أما الشايب.. عيني عليه.. يعمل إيه..؟ ولا بيهش، ولا بينش واحنا بقينا ورق كوتشتينه.. كل الدنيا.. بتلعب بينا.. كله بيكسب، وإحنا بنخسر، و اللي بيلعب.. بينا بيقـدر يرجع لينا.. بأيها وش..! كوم أمريكا.. يا ناس بيزيد، وإحنا. في قلب وطنّا..عبيد.. مش عارفين.. الدور علي مين.. ف فلسطــــين صوت الأقصى.. يقول: مش عار.. يفصل بيني وبينكو جدار.. لو كان غاب.. عنكو كتاب ربنا يبقي المثوى النار.. ليل ونهار، وأنا بانهار.. قدّام منكم كل يهودي يزيد تجريحي.. راح فين دينكم..؟ ولا مسلم ولا حتي مسيحي.. قادر يأخد أي قرار..! يبكي الشعب بصوت مجروح.. منا القدس خلاص بتروح.. صوت مدبوح.. يبكي يقول كفياكم ظلم عايزين سلم.. نلقي الرد علينا دمار . الاستعمار.. عايز حرب.. يرضي أمريكا، يرضي الغرب..؟! وقت الحرب.. كل سلاح طبعا مسموح.. ألف شهيد، وشهيد، وشهيد.. إية..؟ ما يفيض الدم ، يسيل. كله يهون في سبيل.. أمريكا لجل ما تحكم.. إسرائيل.. كل العالم.. من يوم آدم رسموا الحلم، وقالوا خلاص.. لازم نملك كل الدنيا.. ياما سقونا مرار الكأس، وبننداس، وبقالنا سنين..كسروا علينا جميع الأبواب، دخلوا علينا من الشبابيك، قالوا خلاص.. هـ نصفي حساب، حلفوا لشعــبنا.. لنوريك، وف نيو يــورك.. رفعوا شعار.. للحرية .. بصوت كداب، عملوا ضحية، وقالوا بلادنا بلاد إرهاب، في المحراب.. صلوا وصاموا لدين الحرب.. لمّوا الغرب علينا وقالوا: إننا قال.. مش شعب سلام، وان الخير.. ده علينا كتير، قالوا حرام.. إن الناس دي .. يكون لها صوت، لازم نكسرهم، ونفوت، لازم.. صوت الحق يموت. سبُّوا، وطعنوا.. ف الإسلام.. بدأت حرب الدين .. والملّة، قالوا.. لا يمكن نوصل إلاّ.. لو خلينا الكل ينام.. ف الأوهام.. نعمل.. إن هدفنا .. سلام، نضرب سوريا.. مع لبنان، فلمنا برضُه .. مع صدام، وإسرائيل.. تضرب وتلاقي.. ف فلسطين.. وسيبولنا الباقي.. كل عراقي.. هــ يبقي حطام فكر شيطاني، يبقي الجاني بريء في زمنّا والمظلوم.. بقي هوَ مُدان. شرع أمريكا في البلدان.. زي الداء.. ف العــراق.. مع بريطانيا عملوا تحالف، قالوا مع بعض هـ نعمل وِحْدَه. مجلس أمن.. أمم متحدة.. مش هـ تخالف. رسموا وعدّوا.. الاستعداد، قالوا.. الخير كله ف بغداد كل المجلس..قال: مش ممكن إلا الحرب، قالوا.. لا يمكن نرجع صعب.. خدنا قرار م العهد السالف عَدُّوا جيوشهم مين هيحوشهم..؟! نهبوا بلادنا، وقالوا تمام.. شكرا أوي.. مستر صدام.. ترمي بلادك وسط الخيّه للحرامية، وللإجرام..! قالوا.. لابد الفوضى تزيد، علشان نفضل فيها كمان، خلّوا الشعب يعيش متهان.. زرعوا الحزن، خلوا الطفل.. شعره يشيب قبل أوان، داخل سجن.. آبو غريب، شفنا أمريكا.. متعريّة.. أدي أمريكا، وادي الحريّة شعب بحاله.. يبقي ضحيّة طب فين هيّه.. حقوق الإنسان..؟! بعد ما قالوا.. دي فيها سلاح، قالوا.. مفيش..! فيها صـــدام، لازم ينزاح، منبقــيش.. علي حضارتها، جت خربتها، وادي أخرتها، بقت بركان.. يرضي دا مين.. في أيها دين.. م الأديان..؟ احكموا قولوا.. مين غلطان..؟ مين الظالم.. طَبْ مين خان..؟ لو ناسيين.. افتكروا زمان.. درس أمريكا مع فيتنام.. لأجل تنام.. هيّه وترتاح؛ يبقي النووي.. في إيدها سلاح، وإحنا في إيدنا.. يبقي حرام، يبقي العربي.. يا ناس إرهابي، والأمريكي.. رسول إحسان. شرع أمريكا في البلدان، وفــ لبنان.. عملوا عمايل.. يا ولداه،.! قالوا.. النصر في أيدنا مداه، يوم و التاني.. يسلم لينا.. حزب الله.. بس الحزب .. بدأ بإيمان.. حرب المؤمن.. للعدوان، قالوا.. خلاص.. هـ تروح الهيبة عيبة ف حق الأمريكان لازم النصر.. يكون له سبيل.. إسرائيل..! بدأت ف الحال بالأطفال وعشان بوش كمان منفوخ.. قال.. لا شيوخ، ولا حتي صغار.. دمر.. حطـم.. مين يتكلـم..؟ أنا فرعون.. ربكم الأعظم مين زييَّا..؟ حطموا ف البنية التحتيه عايز كل بلادهم ديه.. تبقي دمار. بقي مش عار في جبين أمريكا تشرب من دم الأطفال دم ولادنا.. بقي شلال ف ايدين غدَّار خطفوا البسمة واحلي نهار دهسوا كمان زهر الأوطان يبقي.. في شرع أمريكا حلال طب مين قال..؟ هيّه الروح مش برضوا أمانه ولا مذابح قانا خيال..؟ ألف سؤال جوانا يدين الخاينين هيه دي حرب المدنيين في أيها دين الشعب يباد في أيها شرع عملتوا مزاد بعتوا بلادنا الغاليه رخيص لو أبليس كان قال دا محال لكن ربك بالمرصاد وحده أراد، ونصر ربك حزبه عشان يصبحوا عبره في كل زمان ونقول ايه عن قصة سوريا..؟ ما هي مش كوريا ..! لجل يهاب منها غراب أمريكا العظمي دا أحنا العضمة وهما كلاب. أما إيران.. عملت ليها أمريكا حساب قصة.. وكل ما فيها.. عذاب أقرا كتاب.. أمريكا هـ تعرف دول مين همة ف السودان.. أفغانستان.. تعرف عنهم اكتر لمَّا ييجي اليوم ويكون.. لينا كلمة نبني.. الوطن العربي بذمة والإسلام .. ترجع له الأمة يومها النصر هـ يبقي حليف بكرة تشوف مش تخاريف اصبر.. بس الصبر جمــيل لو خلــــينا.. نبينا دلـيل يومها هـ نقدر.. علي أمريكا، وإسرائيل. ***