زمارة روحك

شواهد كتيره ..

على حلمك الحي فوق الوشوش

لأن انت راحل وسايبلي روحك ..

غيابك بيفتح دفاتر حضورك !

إذا الشمس طلعت ..

بيطلع نهارك لسور المدينه ..

يغني مع الفجر للنور ولينا

ينادي على العتمه .. ترحل

وينشق نهر الأماني ..

تسيل الأغاني ..

على ضفة النهر تروي ..

قلوب العطاشى لنورك !

معاني حضورك ..

بتزرع ملامح وجودك قصايد

تلون شفايف نجومك محبة

إذا الشمس غابت ..

ودابت معاني كتيره ف غيابك ..

مع العتمه بدرك ..

بيطوي المسافه ..

ما بين انتظارك .. وبين انتصارك ..

على سطوة العجز داخل مدارك ..

بإحساسك اللي بينقش وصيَّه ..

على وش ابني الصغيَّر " أسامه "

وكل امَّا يكبر .. بتكبر حروفك

أشوفه .. أشوفك ..

على كل خطوه ..

يخطيها بين الدروب الكتيره !

بدية مسيره ..

لأول خيوط الخطاوي الصحيحه ..

مهياش فصيحه ..

ولكن بصوتك ..

بتغزل آهات القلوب الجريحه !

تعلمها تنطق ..

تعلمها منطق طيور الرساله ..

وحبر الأمانه ..

مهيَّاش محاله ..تكون انت غايب ..

وشمسك بتشرق على كل حي !!