كان يا ما كان

من فين .. وفين باب الخروج .. ؟

العمر موج من فوقه موج ..

والحلم ريح ..

شد الجريح فوق السحاب ..

نزل المطر ..

كان دم نازل م السما .. ذات البروج !

قال الوطن :

لو خطوتك .. منقوشه في أرضك أمل ..

خطى كمان !

عدّى الزمان اللي انفطم .. قبل الأوان !

اسرج حصانك للقمر ..

احسب مساحات السفر

هد المكان

اوعى الوتر ..

يتهز ف عروقك تنوح ..

لملم فروع الشمس ..

روح اغزل مطر ..

يروي جدور العمر ف الأرض البوار

دارك على جْبين القرار !

فين انت فين ؟

مفتوحه أبواب المدينه للشروق

طوق الهزيمه ينكسر فوق الإيدين

العمر واحد .. وانت واحد

إنما ممكن تعيش .. فرد بروحين !!

ضاق الزمن ..

والرحله فينا اتبعترت قبل الأوان

كان يا وطن .. مالهوش مكان !

الزهر تاه ..

واتلف فوق السلم .. التعبان ..

وكان ..

يا أرض حبلت بالأسى ..

طرحت " إيمان " ..

حدوته ما اكتملتشي قبل النوم ..

وليه ..

محذوفه ليه من حصة التعبير ..

وليه ..

معزوفه ليه خرست ف روح الطير ..

وليه ..

النار بتحرق فاكهة البستان .. !؟