كحلِّي عيونك وخليني مرايا
وضحكي علشان سمارك
يضــوي ويلــِّون سـمـايــا
أحلي ما فيكي إبتسامتـــــك
لأ عيونك
لأ شفايفك
لأ خدودك
الحقيقة إنت علي بعضك
حكاية
* * *
آه يا مني روحي
ويا طبِّي ودوايا
علِّمِيني الصبر في بعدك
عسي الموج اللي في ضلوعي
يهدِّي أو عسايا
ضاقت الدنيا في عيني
وغلَّقــت كل الزوايا
وإنت زهرة
طالعة في صحرا فؤادي
وداخلة في كل الخلايا
صعب أحكي لك حكايتي
وصعب يرجع عمر خلـِّيته ورايا
عمر عدي الأربعين
وقلبي لسَّاه بعده صب
حتي وإنت بعيدة عني
الكلام في الحلق ليه
واقف وصعب
يعني عيب لو قلت لك إني بحبك
ولا َّ يعني
عيب علي الشايب يحب
آه يا مني روحي
وآه علي العمر اللي عدي
زي فارس تتري
نازف دمه في كل المدن
وخيوله مش لاقيه ليها درب
كـُنـْتـِي فينك من زمان
تعرفي أنا قد إيه تعبان
ومحتاج للحنان
فرَّغي قلوب اللي حبوا قبل مِنِّي
وإملي قلبي بحبهم وزيديه شوية
صدقيني
عاوز أشيلك بين جفوني
بس من كتر اللي بيهم من ألم
إنت مش هاينة علَّيه
* * *
آه يا مني روحي وعمري
هيه دنيا ولا أكتر
ياما فيه زيِّي آلاف فيها ضحية
منهم اللي باح بسره قبل موته
ومنهم اللي راح وخد وياه سكوته
ومنهم اللي لسه عايش زي حالتي
بس مستني تابوته
* * *
أنت ويا أجمل مني
يا أحلي من صوت الربابة في الغـُنا
يامهرة شاردة في البراري
ياريتني فارسها أنا
يالؤلؤة في جوف محارة
ونجمة عالية في السما
أنا عارف إني معاكي عاوز المستحيل
وعارف إني الدرب ماليه العنا
وعارف إن الناس حتسأل هيه مين
وإنت عارفة الالسنة
علي العموم
أنا باعترف إني بحبك
حتي لو ضهري إنحني
واللي يسأل هــيَّ مين
كل البنات الحلوة
في الدنيا مني
* * *