مربى المانجا بمناسبة حلول المانجا وتشريفها الكريم لينا.. فكرت كتير.. ازاى نعمل منها حاجة حلوة وبطعم مكثف وعبقرى.. غير العصير طبعا وتخزينة والإفترا فى أكلها لغاية ما تستجيبر ههههههههههه اية رأيكم نجرب مربى المانجا وخاصة ان فى آراء مناهضة بتقول لاااااااااااااااااااااااااا المانجا مابتتعملش مربى مع ان اى فاكهة بطعم حلو وبنكهة قوية زى المانجا تنفع ونص ومش هاتقول لأأهم شىء فى التكنيك هنا ان المانجا تكون جامدة يعنى مش مستوية اوى تكاد تكون خضراء جامدة فعلاً يعنى 75% مستوية على الأقل.. هانمسك المانجا هانقطعها لجزيئن بالطول كل جزء واخد كل اللحم قبل البذرة مباشرة وهاناخد كل جزء من الجزئبن تشريح بالطول وبالعرض وبعد كدا كشط بالسكينة لكل المكعبات المسكينة.. هههههههههه هانجيب 2 كيلو سكر لكل كيلو مانجا لحم صافى وهانحط مكعبات المانجا والسكر طبقات طبقات فى نفس الإناء اللى هانحطة على النار وهانسيبها فى التلاجة مش أقل من ساعتين هانطلعها هنلاقيها نزلت ميه هانحطها على النار الهادية بدون ميه لغاية ما السكر هايفك مع المانجا ونسيبها على النار الهادية دى تغلى لمدة على الأقل نص ساعة لغاية لما تعمل عرق يعنى اية تعمل عرق؟ يعنى السكر يتقل ويعمل شريط مش بيتقطع وممكن نعمل تجربة بسيطة بشوية من الخليط على طبق ابيض وخدوا بالكوا لازم الطبق يكون ابيض لو الطبق مش ابيض المربى مش هاتنجح هههههههه لا باهذر معلش اصلى باحب الأطباق البيضا السادة الصينى فدا اللى فى خيالى علشان أطباقى كدا.. المهم هانخد شوية كدا من الخليط دا على طرف المعلقة لو جريت المربى يبقى لسه محتاجة تسوية على النار لو تماسكت كدا وكانت ممطوطة وعاملة شريط ومش بتجرى على الطبق الأبيض اياه يبقى كدا بقت تمام هانروح حاطين لها عصير ليمونتين ونقلبها ونسيبها 3 دقايق كمان على النار ونطفى النار وكدا خلاص وخدوا بالكوا التقليب لازم يكون بمعلقة خشب علشان طعم المربى وياسلام لو عندكوا حلة نحاس تتعمل فيها أصلا بدل الألمونيوم اللى بيغير من طعمها ولونها ولونه ولو حبكت وأكيد هاتحبك لأن مفيش نحاس دلوقتى برغم ان الأوانى الحديثة قعرها طالع نحاس وفيه منها نحاس خالص المهم يعنى لو مفيش ياريت نعمل فى حلة ألمونيوم جديدة..أول أستخدام يبقى علشان تعملوا مربى اعملوا جمعية هههههههههه وطبعا النار الهادية مهمة علشان السكر مايلزقش فى الحلة فى القعر وعلشان يسيح براحتة هاتكونوا مجهزين البرطمانات المتعقمة بمية مغلية ومنشفينها أو محطوطة فى الفرن لمدة 10 دقايق مثلاً فى درجة حرارة هادية لغاية لما تحسوها سخنت وتعبوا المربى سخنة يعنى تهدى شوية وتحطوها وتغطوها كويس وبعدين تبرد وبعدين تتحط فى التلاجة.. ودا بقى الإختراع اللى اسمه مربى المانجا وبتبقى حلوى جداً كحشو للجاتوهات والتورتات ومع التوست والميلفى وكمان كحشو للكريب بجوار صوص المانجا والقطع الفريش كتزيين يارب تعجبكوا وممكن تجربوها فى كمية مانجا صغيرة كنوع من انواع التجديد..والتجريب ولو الموضوع نال رضاكم ممكن ننزل هنا حلويات المانجا وكمان عصاير وكوكتيلات وسلطات مختلفة.. دمتم بخير ...وألقاكم فى سعادة..