كان ياما كان.... حلم زمان مرّ علينا فـ ليل حيران
لف شوارع قلبى الطيب وعشان قلبى كان غفلان
فتح البابْ وبطرف جناحه سرق النوم والحلم كمان
***
كانوا زمان لينا وكنا أشجار حُبْ جوّه الجنّه
بعد سنين اشواق هُنّا والافراح صبحت احزان
مر علينا صباح وصباح من غير نور ولا افراح
واحنا فـ بحر دموع وجراح والامواج قسوة وحرمان
***
قلبى يا واحة حب ونور ليه الحزن عليك بيدور
خدت دموع الدنيا بحالها وانت ضعيف بجناح مكسور
جفف كل دموعك فوق بكره اكيد الدنيا تروق
بكره حتخرج بره الطوق لما يبان للنور عنوان