فاكره زمان
علي التوتة..
رسمنا قلب
سهم ودار،
وشمس نهار،
وبنوتة..
بيغسل توبها
ضىّ الشمس،
وبتغني..
بلغة الهمس
وبتحكي..
لبكرة وأمس..
حدوتة
كانت حلوة
وقمورة
واحلي
من أي بنوتة،
وتطلع..
زي قمر الليل
علي ليلها،
ونيلها..
كان بيفتنا..
جمال يشبه
تقاسيمها،
وتقاسيمنا،
وصوت..
يشدو كما المواويل
وشمس أصيل
علي الضفة،
وع الشفة..
كلام..
يسحر نجوم الليل،
وورد وزهر
عنابي شفايفها،
ولمّا لمحت
مخاوفها..
قفلت..
عليّا محرابي،
ورحت أصلي
صلواتي،
وأدعيلها.
يا رب أقبل
دعًوًاتي
ماليش غيرها
ماليش غير
حضنها سريري،
وتفكيري..
أتْقِسِم نُصين
فيه ناس..
بتحب ليه..
واحده،
وناس..
بتحب بالملايين،
وناس..
معدومة م الإحساس،
وناس..
بتغني في الزفة،
ومش شايفة،
ولا عارفة..
تغني لمين..؟
وأنا مقسوم لي
أحب أتنين.
بحبك أنت
يا أمي،
وأم عيالي،
والبنتين
منار الأولي
سنة أولي
غرام فيكِ
يا أم الدنيا،
والتانية
دي مَيّ..
شقاوة العاشقين.
خسارة يا قلبي
مش شايل
يا ريت..
عندي كمان قلبين
لأني بجد..
مش طايل..
اسيب حته
من الإحساس..
أوزعهاعلي الباقيين
خلاص..
قلبي أتملي بالحب
وبحر حنين
ليلاتي يصب
ومش عارف..
أوديه فين..!
يا ربي..
صونها وأحرسها
دي حسّاني،
وأنا حاسسها
يا قمره..
بتسبل القصة
علي أجمل،
واحلي جبين
بيلمسها..
دي أنفاسها..
عبير ونسيم
دي سنيورة،
ومحفورة..
في جدران قلبي
ع الجنبين.
بنينا طوبة
فوق طوبة..
علي ترابها،
وكبر الحب
أسطورة..
في محرابها،
ومكتوبة أسامينا
علي سحابها،
علي جريد النخيل
ع الضِلّْ
علي نسمة
عبير بتهلّ
علي نجمة،
وقمر بيطُلّ..
على الضحكة
بوادينا،
علي الخضرة
علي الصحرا
اللي بتنادي
الربيع فينا،
علي الماضي،
علي بكرة
اللي مستني
بلهفة..
لجل ما يجينا،
علي سحاب
الأمل والحلم.
يا أجمل غنوه
جوه الدم،
كتبتك..
في العيون السمر
نشيد للحب..
يتغني
مع العصافير
علي الأزهار
قصيدة..
عشق م الجنة،
تغير منها
جميع الأشعار،
وتتمني
تبوس خدك
وتعبد نظرة
ف عنيكِ،
وحواليكِ
نطير.. نرقص
على الأغصان،
بأحلامنا،
وأنا فرحان وبتهنا..
في قلبي..
لسه تاني كلام،
وشوق وحنان،
وألف غرام،
وزغروته
بحبك
لو هـ موت فيكِ
متين موته..
بحبك
يا مصر..
يا احلي حدوتة
***