يالله عفوك يوم تصفيـة الحسـاب
يومٍ حصاد لما زرعنا في السنيـن
يوم الحشر قرب ولا معنا زهـاب
اليوم في الدنيـا وبكـره راحليـن
نجني ذنوب ونرتجي عفو وثـواب
وعلى نصر ربي لنـا مستعجليـن
تدرون ليـه امالنـا كنهـا سـراب
تدرون ليه النصر سيـف الاوليـن
الاوليـن اعمالهـم وفـق الكتـاب
قاموا عليه وباعـوا الدنيـا بديـن
وحنا غفلنا بيـن مـا لـذ وطـاب
والنصر سيـفٍ مايسلـه غافليـن
نصبح على شوف انتهاكات وخراب
ونمسي على دمع وتنهـات ونيـن
بصدورنا شي تذوب اله الهضـاب
وافعالنا والواقع ريـاح ..وطحيـن
وعلى العيون من الفتن مثل الضباب
معد درينا من يسـار ومـن يميـن
ما للضعيف الا الدعا لو مايجـاب
ماغيره الا الشوف مكتوف اليديـن
يالله زلزل تحت الاعـداء التـراب
والطف بنا واحقن دماء المسلميـن
ندوعك ياقادر على جعل السحـاب
جيش لنصـرة قلـةٍ مستضعفيـن
اغرقهم بنوع من انـواع العقـاب
غرق الغلام اللي يحسب انه فطيـن
لوما عصى نوحٍ نجا به في رحاب
سفينته وامضى معه في العمر حين
لكنه اختـار الخسـاره والذهـاب
اصنع بهم صنعك به وانت المتيـن
والا اخذهم يامجري ٍ سود الحقاب
اخذ العجوز اللي بقت في الغابرين
ذوقهـم اللهم انــواع الـعـذاب
اللي عثوا في ارضك امن المفسدين
والطف بمن لبسوا من التقوى ثياب
عبـادك المستهدفـيـن المتقـيـن
تكالبـت عليهـم انيـاب الـذئـاب
ولا غير عونك يامعين الصابريـن
من بينهم شيبه يعجـزون الشبـاب
من وقفته من طولها. في الركعتين
ومن بينهم بنت تون بـلا حجـاب
احجابها لفوا بـه الجـرح المكيـن
وطفلٍٍ عن عيون امه الثنتين غـاب
تبكيه عين وتلتفـت لأخيـه عيـن
من هول مايجري لهم شاب الغراب
ياوسع حلمك وانت مافوقك مديـن
ادعيك وانت ادرى بحال اهل المصاب
وامد كفي لك يا اكرم الاكرمين
بواسطة: أجــوديــه