مش عارفين
ذنب بلدنا
ف رقبة مين؟
اللي بيسـرق،
واللـي بينـهب،
واللي بيحـرق
فيـها ويشرب
من دم الناس
المساكين،
واللي معاه
سكين بـ يقطَّع
ويبيع فيها،
ومش بفلوس..!
واللي راميها
في جيب حراميها
واللي عشان
مصلحته يدوس
على أحلامنا
يلم فلوس
ويحوِّل بره الملايين
واللي بقاله
سنه وسنين
مش راضي يقوم
من علي كرسيه
فاكر إنه
مافيش بعديه
رافض يبقى
في يوم مرحوم
فاكر إن
الكرسي يدوم
طب لو دام
كان يوصل ليه ؟
واللي فى عمره
ما يوم أهتم
كلنا المَمْ،
وحلَّى بدم المصريين
واللي يتاجر
ف الأرواح،
والسفاح،
واللي بيسخر
من أفكارنا
ومفكرنا إننا مجانين
واللى جرينا
وراه حافيين،
مش عارفين
هـ يخدنا لـ فين..؟
واللى لاعنده
ضمير ولا ذمة
واللي ما لوش
لا يمين ولا كلمة
واللي ما عندوش
مله ودين،
واللي مفكر
مالنا حلال
عبَّى وشال
منه جبال
واللى يقولوا
رجال أعمال
ليل ونهار
بـ يتاجروا
ف قوتنا
خربوا بيوتنا
بالإستغلال
واللي يسوق
ف الاستهبال
حاجه خيال
واللي بيحصل
فينا دا شيء
فوق الصبر
مين هـ يطيق..؟
مر العمر
علينا وفات
ف الأزمات
قلبنا مات،
ولا غرقنا
ف الشهوات..؟
علشان كده
ربنا غضبان
م اللي بيحصل
فينا يا عين
حتى ف شرع
الله والدين
تلقى مشايخ
مش فاهمين،
يفتي الفتوه
يا ناس من دول
لجل ما يرضي
ناس تانيين
عنده يزعل
أي رسول
ميزعلش المسئولين
وف دعـــواه
ما يكونش أمين..
لجل ما يرضي
مين ولاَّه
عيني علينا
يا حول الله
دينا وذنبه
في رقبة مين؟
مش عارفين..!
اللي بيبني
ف الأبراج
واللي يقول
أزمة إسكان
والمحتاج
لساه محتاج
تايه ضايع
في الأحزان
خايف يعيى
مافيش لا علاج
ولا فيه مال
عنده يوديه
لـ طبيب يداويه
يعني يا ناس
وبدون إحراج
حاله عدمان
دا الغلبان
ضاع في النص
واللي اتحكم
فيه بـ يرُصّ
بالأكوام
ف الكتمان
من غير حتى
ما حد يحس
واللي بيحلم
يوم بالرخص
يلقي الدنيا
مولَّعه نار
و الأسعار عماله
تزيد باستمرار
ليل ونهار
حاجه مرار
نص الشعب
فقير كحيان
وسط بحور
الهم بـ يغرق
والربان مش
عايز يصدق
ولا بـ يحس
نار العوزه
بتضني وتحرق
هوه الفقر
مَسَك ف بلادي
للدرجة آدي
للدرجة آدي
بلدنا فقيره
ولا غنيه..؟
طب فين هيه؟
ليه مش باين
خيرها عليَّه
وعلى أولادي
ولَّا مافيش
عدل وتسويه
ولَّا بلادي
مستهتره
بـ ولادها وبيّا
ولا العيب
في الشعب وفيّا؟
دانا مش خاين
دانا بتمنى
تراب رجليها،
وبموت فيها.
د أنا افديها
بروحي ودمي
من أي أعادي،
واستعدادي
أدِّي زيادة
بس أنا نفسي
نعيش في سعاده
بلدي يا ناس
للخير ولاده
مش محتاجه
نفسي يكون
للظلم عنين
يرأفوا حبه
بـ ناس عايشين..
مش عايشين..!
ونقول إيه،
والمسكين
مش لاقي القوت
حتي الموت
مش راضي يجيه
مهما ينادي
بعلو الصوت
مش سامعين
ولا عايزينه
يعمل إيه؟
يسرق..
زي ما كله
بيسرق؟
لجل يعيش
أصلي مفيش
في جيوبه جنيه
لمَّا يجوع
ياكل بعضيه
يعطش..
بحر مرارة يسقيه
ومغطيه
برد الليل
ويخاف
حتي الصبح يصبح
تاني عليه
ما هو مولود
غلبان وفقير
في زمان فيه
المحتاج
كله بـ يرميه
ما هو مش لاقي
حد يعين
يشكي ويبكي
بدمع العين
مين مسئول ؟
حد يقول؟
اللي بيحصل
فينا شويه
نشكي لمين؟
يا ولداه
اصل الشكوى
لغير الله
تبقي مذلَّه
تبقي إهانة
تبقي ممله
نهش الفقر قلوبنا
ما خَلاّ
كله بـ يلعب
وبـ يتسلاّ
بالغلبان المظلوم
اللي عشاه
صبر ونوم
مهما الأمراض
تنهش فيه
ربه حاميه
تاني يقوم
علشان حاسس
انه وراه
كوم أطفال
لو يوم مال
مين هـ يشلهم؟
ليل ونهار
عمّال شغّال
زي حمار..
لجل يأكِّلهم.ّ
مين هـ يساعده..؟
إلا سواعده
كل ولاده
ف التعليم.
أيوه عظيم
بس منين
هـ يجيب مصاريف
شايف أمسه
ويومه مخيف
بس بحلم
برضه بـ بكرة
ويقف وحده للتيار
فارس وأقوي
من الفرسان
ليل ونهار
وسط النار
بـ يحارب فقره
شارب جدا
م الأخطار،
لكن قانع
مش بيمانع
حامد ربه
ساكن قلبه
أقوى ايمان
ما بيرضاش
أبدا بحرام،
لو يوم نام،
أو بات في الشارع
فيه القوة
يا ناس بتصارع
ولا يقبلش
في يوم إحسان
جايز فعلاً
معاهوش قرش
لكن نايم
فوق الفرش
خالي البال
ماله حلال
بارك فيه
المولي عشان
طالب ستر
مش شيال
ف المال بـ يهيم
دا بملاليم..
عايش مستور
وسط النور
عمره ما زوَّر
ولا قال زُور
عمره ما قال
للغير محتاج
عمره ما يغدر
بالأوطان،
ولا باع مرة
ضميره وخان
قلب انسان..
يحمي بلاده
من العدوان
عمل الواجب
قوي وزياده
ربَّي ولاده
ع القران
كل حياته
دين وعباده
عنده إراده
وكله إيمان.
حامد ربه
أصل الفقر
يا ناس مش ذنبه
آمال ذنبه
في رقبة مين..؟
مش عارفين..!
وأنا واحد
من بين ملايين
إنسان عادي
خدت شهاده
بقالي سنين
قلت يومين
وهـ لاقي وظيفة
قالو ما فيش
في بلدنا وظايف
بـ عنيك شايف
قلت يا ناس
أعمل مشروع
بس رصيده
أجيبه منين؟
سلف ودين
وفلوس بالفايض
حاجه مخيفه
أبدأ رحلة
عمرى بدين
مش هـ اداين
مرت سنة وسنين
مش باين
ليها جواز
أي جهاز
محتاج لفلوس
وأنا منحوس
والمنحوس..
هـ يجبها منين؟
الله يعين
عدي وفات
من عمري سنين
سنة سنتين
قول عشرين
قول تلاتين
قول خمسين
قول أنا ذنبي
في رقبه مين..؟
أنا والفقرا
المصريين
مش عارفين
ذنبنا يبقى
ف رقبة مين..؟
***